कुडाळ तालुक्यात उद्यापासून उमेदवारी अर्ज दाखल करण्यासाठी होणार गर्दी

कुडाळ | प्रतिनिधी
जिल्हा परिषद व पंचायत समिती निवडणुकांच्या पार्श्वभूमीवर कुडाळ तालुक्यातील इच्छुक उमेदवारांची लगबग वाढली असून उद्या सोमवारपासून उमेदवारी अर्ज दाखल करण्याची प्रक्रिया सुरू होणार आहे. त्यामुळे तालुका निवडणूक कार्यालयात उमेदवार व त्यांच्या समर्थकांची मोठी गर्दी होण्याची शक्यता आहे.
निवडणूक कार्यक्रम जाहीर झाल्यानंतर विविध राजकीय पक्षांचे अधिकृत उमेदवार ठरवण्याची प्रक्रिया अंतिम टप्प्यात असून अनेक इच्छुक उमेदवारांनी आधीच अर्जांची खरेदी केलेली आहे. पक्षीय उमेदवारी जाहीर होण्याची प्रतीक्षा, युती–आघाड्यांच्या चर्चा आणि स्थानिक राजकीय गणिते यामुळे अर्ज दाखल करण्याच्या पहिल्या दिवशी उत्सुकता शिगेला पोहोचली आहे.
दरम्यान, संभाव्य गर्दी लक्षात घेऊन निवडणूक प्रशासनाकडून आवश्यक ती तयारी करण्यात आली असून कायदा व सुव्यवस्था राखण्यासाठी पोलिस बंदोबस्त ठेवण्यात येणार आहे. अर्ज दाखल प्रक्रियेत कोणताही अडथळा येऊ नये यासाठी स्वतंत्र कक्ष, वेळापत्रक व मार्गदर्शक सूचना जाहीर करण्यात आल्या आहेत.
आगामी काही दिवसांत उमेदवारी अर्ज दाखल करण्याच्या प्रक्रियेला वेग येणार असून कुडाळ तालुक्यातील जिल्हा परिषद व पंचायत समिती निवडणुकीची खरी रंगत आता सुरू होत असल्याचे चित्र आहे.